حلقات برنامج عريس من على النت (5)

نتابع معكم حلقات برنامج عريس من على النت

بطولة

النجمة الصاعدة من كبار صفحات ومواقع النت (عفاف العنتبلى )

النجمة المحترفة فى الكوميديا الصاخبة الحاجة (ام عفاف)

وطبعا نجم اليوم وكل يوم المعلم العنتبلى صاحب الكوميديا المصرية الرائعه
الحلقه الخامسة

كــــاميرا 1 .......................اجهز
كاميرا 2 ................استعد
كاميرا 3.......................صور

اكشــــــــــــــن

حاتم: المهم000بدأت أعجب بيها وأتابع مشاركاتها ومشيت وراها فى كل موضوع تروحه! خرجت من ساحة الشباب للمنتدى السياسى خرجت وراها لقيتها شاركت فى موضوع عن بوش وشارون شاركت معاها وشكرتها على مشاركتها ونسيت أشكر صاحب الموضوع الأصلى! رغم انها أصلا كانت داخلة تشكره فشكلى كان نيلة ساعتها! ولقيتها سابت السياسة وراحت لروضة الأخوات فى موضوع تعارف وأنا كنت ماشى وراها كالمسحور فشاركت بعد مشاركتها على طول رغم إن الموضوع للأخوات فقط ومأخذتش بالى إلالما المشرف وقفنى! وعلى ما سجلت بإسم جديد مؤقتا لقيتها فى المنتدى العام بتشارك فىموضوع للنكت فقلت فرصة أكتبلها نكتتين يضحكوها قبل ما تشارك هى وفعلا كتبت نكت جامدة قوى وقلت أكيد هتضحك لقيتها كاتبة عتاب طويل عريض لصاحب الموضوع إن النكت دى ما يصحش تتقال فى منتدى إسلامى وبتنصحه إنه يشيل الموضوع ويراجع نيته!!!

لقيتها دخلت موضوع شمس وقمر قلت أهو فرصة نلعب سوا! فدخلت قلت شمس قبل ما هى تقول قمر واستنيتها كتير تقول قمر بدون فايدة فقلت لنفسى معقولة دة كله بتكتب ثلاث حروف؟! ولا يمكن بترسم لهم القمر ذات نفسه !

المهم بعد 5 دقائق لقيتها رازعة صاحب الموضوع كلمتين عن المشاركات الهادفة والجد ومراعاة ظروف المسلمين المعتقلين والمعذبين والمقتولين لغاية ما نفسى غمت عليا! فسحبت كلمة شمس وكتبت بدالها تحيا الوحدة الإسلامية!

وقلت البنت دى لازم تبقى من نصيبى لأنها إيجابية جدا ومحترمة جدا فطلبت إيميلها من المشرف قالى ممنوع! حاولت أقنعه وقلتله ياعم يرضيك يرضيك مافيش فايدة!!!

طبعا الأب والأم قاعدين مسبهلين ومشفاهمين أى حاجة ويستمعون لحاتم ويؤئمون برؤوسهم كأنهم يفهمون! ولكن عفاف كانت تبتسم وقالت

إمال عرفت إيميلى إزاى؟!

حاتم: قدرا! 000لقيتك كاتباه لواحدةصحبتك فأخذته على طول!

الأب: إحنا إن شاء مش هنخلص النهاردة؟!

حاتم: أنا آسف يا عمى 0000حضرتك موافق طبعا؟!

الأم: يوافق على إيه يا جدع إنت هو سلق بيض!

الأب: انت عاوزنى أوافق على إيه هو انت قلت حاجة أوافق عليها؟!

حاتم: طبعا ياعمى على عرضى للزواج من كريمتكم عفاف!

الأب: انت فاكر اننا هنقبلك كدة بطولك؟!00000من غير ما والدك ووالدتك يوافقوا و نتفاهم عالتفاصيل!

حاتم: وفيها إيه ياعمى بس هو مش أنا الى هتجوز ولا هما؟!

الأب(وقد فاض به الكيل): اسمع ياد إنت! 000بقى أنا صابر عليك من الصبح وإنت عمّال تحكيلى قصة حياتك كأنك صلاح الدين! وبعدين عمّال تقولى كنت بجرى ورا البت عالنت من موضوع لموضوع لغاية ما قطعت نفسى وجت اتقدمتلها!

نيجى بقى للمفيد 000إذا كنت فاكر إنك هتضحك علينا بالخمسة كيلو موز دول فأنت غلطان دة أنا ممكن أزحلقك بيهم دلوقتى !!!00000لو عاوز تخطب عفاف فعلا هاتلى أبوك وأمك عشان نتفاهم غير كدة قضيها مواضيع عالنت أحسلك!!!

أما عفاف فأهى قاعدة معانا أهى بتاكل وبتشرب ولو ما نفعتشى فى الجواز ممكن ندبحها عالعيد مافيش أىمشاكل!!!!!!!!!!!!!!!!!

عفاف: يا بابا بس 0000

قاطعها العنتبلى

اخرسى يا بت إنتى وخشى جوة!

حاتم: ماهو ياعمى أنا كنت ناوى

قاطعه العنتبلى بدوره 000

ناوى إيه بقى؟!0000بقالك نص ساعة ناوى؟!000 على ما تعمل حاجة هيكون اليوم خلص

أنا خلصت الى عندى روح شاور أهلك والمرة الجاية لو فيه يعنى هاتهم معاك !

حاتم: طب يا عمى ممكن00000

قاطعه العنتبلى مرة أخرى

بقولك إيه؟! فى جاموسة هنروح ندبحها كمان شوية لو أخرتنى ممكن أ00000!!!!

حاتم(مذعورا): لا يا عمى على إيه00000سلام عليكم!

العنتبلى: وعليكم السلام يا سى طالب أفندى! قال عريس من النت قال!!!

شوية شوية تجيبيلى عريس من الإنترنت!!!!!

وبكده يبقي فاضل حلقه كمان لما نشوف أيه الى هيحصل

يا تري هيكملوا ولا هيرفكشوا ولا ايه الكلام

بعد ما قضت عفاف مع حاتم يومين من اجمل الايام

حصل خلاف بينهم وانتهى الخلاف بايــه تعالوا نشوف مع بعض

يااااااااااا خسارة فاضل حلقه واحدة بس
يلاااااااااااا
بس جميل اوووووووي
بجد والله
بس متاخرش علينا الحلقه الاخيرة
في تقدم ياقمر geek

» حلقات برنامج عريس من على النت (1)
» حلقات برنامج عريس من على النت (2)
» حلقات برنامج عريس من على النت (3)
» حلقات برنامج عريس من على النت (4)
» حلقات برنامج عريس من على النت (6) والاخيرة.